【🚗 MD 唔係遊車河咁簡單 📸】

愈嚟愈多愛車之人，都鍾意駕駛自己嘅愛車 Morning Drive (MD)兜吓風。去MD當然就唔係遊車河咁簡單啦，重點其實係揸去俾攝影師們捕捉愛驅動感一瞬間影靚相。近期攝影師出沒嘅時間更由星期日Sunday Morning Drive (SMD)，擴展至星期六甚至平日晚上Night Drive (ND)添，而且運作更邁向職業化，不但自設個人社交平台，甚至開設團隊及品牌網站，為愛車之人或車會提供私人攝影服務。

以下就同大家分享幾個攝影師們出沒熱點，想成功被捕捉就要留意喇！

____________________

⭐ 週末熱點

1)  鹿頸   

路線：大尾篤村停車場至鹿頸路9號

[被捕捉機會:📸📸📸📸📸]  大美督至鹿頸新娘潭路係熱門Morning Drive路線，彎多而且路面相對較闊，景緻怡人，又有茶餐廳聚腳，的確係遊車河吹水好地方。但歷年來都有唔少意外發生，所以警方喺相關路段都設置偵測超速相機，並一直加強反超速執法，所以有兩點要留意，第一係唔好超速，第二就係任何時候都唔好越線。

2)  石澳   

路線：深水灣至石澳停車場

[被捕捉機會:📸📸📸📸]  窄而急速嘅彎道令石澳道成為車迷係港島遊車河必到之處，而攝影帥捕捉位置多數近石澳沿路或鶴咀路牌附近。因為彎道較窄，要留意嘅係任何時候都唔好越線，以及先讓大車先行轉彎。

3) 大埔道

路線：大埔道近郝德傑道至七咪半休憩花園

[被捕捉機會:📸📸📸] 大埔道非常容易到達，係九龍區遊車河熱點，而且路面相對較闊，更係電單車車友必到之處。攝影帥捕捉位置多數係衛奕信徑第5及6段交接點對出停車場附近或大埔道近徑口路附近，但要留意嘅係任何時候都唔好越線。

⭐ 平日晚間限定

4) 西洋菜南街

路線：西洋菜南街近豉油街

[被捕捉機會:📸📸] 攝影帥平日晚上會不定期出沒係西洋菜南街近豉油街，百老匯對出位置捕捉霓虹燈與車嘅一瞬間。但係出沒時間就要留意汽車攝影相關群組或攝影師個人社交平台。